Einn ríkasti maður Bretlands, Sir Richard Lexington Sutton, fannst látinn á sveitasetri sínu í gærkvöldi. Sutton var afar efnaður en eigur hans voru metnar á 301 milljón punda eða rúmlega 52 milljarða í íslenskum krónum.
Samkvæmt The Sun lést Sutton eftir að hafa verið stunginn. Kona var með honum á setrinu var særð eftir árásina en talið er að konan sem um ræðir sé eiginkona milljarðamæringsins. Sutton var úrskurðaður látinn á vettvangi en farið var með konuna tafarlaust á sjúkrahús. Hún er á lífi en er þó ennþá í lífshættu. Þremur klukkustundum eftir að Sutton fannst látinn var 34 ára gamall karlmaður handtekinn í London, um 160 kílómetrum frá sveitasetrinu. Maðurinn sem var handtekinn þurfti einnig að fara á sjúkrahús vegna áverka en hann er ekki talinn vera í lífshættu.
Sutton hefur verið lýst sem „gömlum enskum heiðursmanni og landeiganda“ en hann átti gríðarlega mikið af eignum um allt Bretland, landssvæði, hótel og sveitir. „Þetta óvænta andlát Sir Richard Sutton er okkur afar þungbært,“ sagði talsmaður fyrirtækis Sutton, Sir Richard Sutton Limited, í dag. „Sir Richard var hugulsamur, gjafmildur og góður fjölskyldumaður sem hugsaði hlýtt til allra sem unnu fyrir hann og hugsaði um þá sem hluta af fjölskyldunni sinni. Hann helgaði sig fyrirtækinu og fólkinu í því og var með háa staðla og kröfur fyrir hótelin, sveitirnar og eignirnar sem fyrirtækið hans á. Hugur okkar er hjá Sutton fjölskyldunni“