Það er raunveruleg hætta á að önnur bylgja kórónuveirufaraldursins, sem veldur COVID-19, ríði yfir Bretlandseyjar að mati þarlendra sérfræðinga. Þessa spá setja þeir fram áður en Bretar hafa náð sér út úr fyrstu bylgju heimsfaraldursins og eru enn að vinna að opnun samfélagsins á nýjan leik.

Sérfræðingarnir segja miklar líkur á að margir staðbundnir faraldrar komi upp þar sem margir munu smitast. Bretland er á meðal þeirra þriggja landa þar sem flestir hafa látist af völdum veirunnar. Staðfestum smittilfellum hefur þó fækkað að undanförnu.

Veitingastaðir fá að opna á nýjan leik í byrjun júlí og fjarlægðarkröfur á milli fólks verða minnkaðar úr tveimur metrum í einn. Bretum verður gert að nota munnbindi á almannafæri.

Önnur bylgja heimsfaraldursins hvílir eins og martröð á yfirvöldum víða um heim og þrýsta margir stjórnmálamenn nú á að undirbúningur hefjist nú þegar undir hvernig á að takast á við þá bylgju.