Molly Lixey, Hjúkrunarfræðingur frá Michigan-fylki í Bandaríkjunum, hefur birt myndband sem sýnir hversu auðvelt það er að smitast af COVID-19 þótt maður noti til dæmis plasthanska.

Myndbandið gerði hjúkrunarfræðingurinn eftir að hafa farið í verslunarferð og séð fjölda viðskiptavina nota plasthanska. henni fannst það frábært, en verra fannst henni að engin virtist vita hvernig ætti að nota þá rétt, til að forðast smit.

Molly tók málin í sínar hendur og gerði myndband sem hún birti á Facebook. Nú hefur myndbandið vakið mikla athygli og birst í fjölmiðlum út um allan heim.

Í myndbandinu lýsir og sýnir Molly því hversu auðveldlega smit getur farið um matvöruverslun. Hún notar málningu til að tákna sýkla og pappaspjald sem táknar símann hennar.

Að myndbandinu loknu er áhorfandanum ljóst að ansi lítið þarf að eiga sér stað til þess að maður smitist.

„Það er tilgangslaust að vera með hanska ef þú þværð þér ekki í hvert skipti sem þú snertir eitthvað.“ sagði Molly við CNN.