Íran hefur orðið illa út í COVID-19 faraldrinum. Samkvæmt tölum frá Johns Hopkins háskólanum í Bandaríkjunum hafa að minnsta kosti 2.500 Íranir látist af völdum veirunnar. Gervihnattamyndir af borginni Qom sýna að yfirvöld eru að grafa fjöldagrafir fyrir fórnarlömbin. Samhliða því sem ástandið í landinu versnar hefur færst í vöxt að rangar upplýsingar um veiruna nái sér á flug. Á samfélagsmiðlum er stungið upp á ýmsum aðferðum til að forðast smit og til að læknast af henni. Þetta hefur haft alvarlegar afleiðingar í för með sér.

Eitt af ráðunum sem mikið hefur farið fyrir er að alkóhól geti verndað fólk fyrir smiti. Mörg þúsund manns hafa farið að þessu ráði og drukkið metanól, einnig þekkt sem tréspíra, en það er eitrað. Á föstudaginn létust 480 manns eftir að hafa drukkið metanól og tæplega 3.000 veiktust. Metanól getur lamað öndunarfærin, valdið varanlegri blindu og í versta falli dauða.

Áfengisneysla er bönnuð í Íran en áfengir drykkir eru seldir í miklu magni á svarta markaðnum. En þetta áfengi er mismunandi að gæðum og inniheldur oft metanól.

Írönsk heilbrigðisyfirvöld hafa ráðlagt fólki að forðast að fara þessa leið. Í sumum héruðum landsins er ástandið svo slæmt að fleiri hafa látist af völdum metanóleitrunar en af völdum COVID-19 veirunnar.