Jair Bolsonaro, forseti Brasilíu, er ekki sannfærður um að COVID-19 faraldurinn sé mjög alvarlegur og segir að hér sé bara um „litla inflúensu“ að ræða. Hann vill ekki grípa til harðra aðgerða til að reyna að halda aftur af útbreiðslu veirunnar sem nú þegar hefur orðið 34 að bana í Brasilíu. Hann segir að fólk muni fljótlega átta sig á að þeir ríkisstjórar í Brasilíu, sem hafa gripið til harðra ráðstafana vegna faraldursins, og flestir fjölmiðlar hafi blekkt það.

Vikum saman hefur Bolsonaro, sem er hægrisinnaður popúlisti, vísað því algjörlega á bug að Brasilíu stafi ógn af faraldrinum. Fyrir tveimur vikum sagði hann faraldurinn vera „ímyndun“. Norska ríkisútvarpið skýrir frá þessu.

Í viðtali við brasilísku útvarpsstöðina R7 sagði hann að fjölmiðlar reyni að blekkja fólk til að halda að faraldurinn sé hættulegri en hann er í raun og veru.

Faraldurinn breiðist nú út í Suður-Ameríku og hafa Brasilíumenn lokað landamærum að öllum nágrannaríkjum sínum nema Úrúgvæ fram að páskum. Bolsonaro hefur sætt harðri gagnrýni fyrir hvernig hann hefur tekið á faraldrinum til þessa.

Kjósendur hafa ekki verið eins óánægðir með hann og þeir eru nú síðan hann tók við embætti í janúar á síðasta ári. Aðeins 34 prósent aðspurðra segjast ánægðir með störf hans samkvæmt tölum frá Datafolha.

Bolsonaro hefur stundum verið sagður vera Donald Trump Latnesku-Ameríku. Hann er þjóðernissinni, efast um að loftslagsbreytingar af mannavöldum séu að eiga sér stað og er andvígur alþjóðavæðingu.