„Við stefnum á að senda fyrstu konuna og karl til suðurpóls tunglsins 2024. Við leitum því að fleiri geimförum til að fara til tunglsins og síðan til Mars.“
Er haft eftir Jim Bridenstine, forstjóra NASA, í fréttatilkynningu.
Það má búast við hörðum slag um störfin því þegar NASA auglýsti síðast eftir geimförum, árið 2015, sóttu rúmlega 18.000 manns um. Aðeins 11 komust í gegnum nálaraugað.
En þeir Íslendingar sem hafa hug á að verða geimfarar geta væntanlega alveg gleymt því að sækja um þessi störf því aðeins bandarískir ríkisborgarar koma til greina. Auk þess að vera með bandarískan ríkisborgararétt þurfa umsækjendur að hafa lokið háskólanámi í vísindagreinum á borð við stærðfræði eða eðlisfræði. Þeir verða einnig að vera með minnst tveggja ára starfsreynslu í störfum sem líkjast störfum geimfara eða hafa flogið þotum í minnst 1.000 klukkustundir.