Írskur maður sem hafði í tæp ár lifibrauð af því að rækta og selja kannabis, var handtekinn árið 2017 og síðar dæmdur til fangelsisvistar. Við reglubundið eftirlit hafði lögreglan fundið kannabis að andvirði 2000 evra, eða tæplega 280 þúsund króna, í bíl mannsins. Á heimili mannsins fann lögreglan meira en 500 kannabisplöntur að andvirði um 400.000 evra eða rúmlega 55 milljóna króna. Það átti þó eftir að koma í ljós að eignir mannsins voru mun meiri. The Irish Times skýrir frá þessu.

Hann hafði nefnilega notað ágóðann af kannbissölunni til þess að fjárfesta í bitcoin, sem hann keypti 2011 og 2012, þegar hægt var að kaupa bitcoin fyrir undir 2.000 krónur stykkið. Maðurinn fjárfesti í meira en 6.000 bitcoin. Í dag kostar bitcoin meira en 1,2 milljónir króna, sem þýðir að 6.000 bitcoin myndu kosta meira en 7,2 milljarða króna.

Samkvæmt The Irish Times þorði maðurinn ekki að geyma allar bitcoin myntirnar sínar á einum reikningi, þess vegna stofnaði hann 12 nýja reikninga og deildi bitcoin myntunum sínum á milli þeirra. Þetta þýddi að hann þurfti að nota 12 mismunandi lykilorð, sem hann skrifaði á miða sem hann faldi í kassa með veiðigræjum á heimili sínu í Galway.

Eftir að maðurinn var handtekinn árið 2017 var brotist inn á heimili hans, auk þess tæmdi leigusalinn húsið og var stórum hluta af eignum hans hent á haugana. Margir segjast muna eftir því að hafa séð veiðigræjur, en engin hefur séð kassann með veiðidótinu og þar með lýtur út fyrir að lykilorðin séu glötuð.

Írska lögreglan telur að saga mannsins um lykilorðin í veiðikassanum sé sönn og byggir það á viðtölum við fjölda vitna. Lögreglan vonast til þess að dag einn verði hægt að fá aðgang að reikningum mannsins og gera bitcoin myntirnar upptækar, þannig að írska ríkið fá notið peninganna.

Maðurinn hefur sætt sig við tapið og segir að þetta sé það sem hann fái fyrir eigin heimsku.