Norska lögreglan telur að Anne-Elisabeth Hagen, sem var rænt af heimili sínu í útjaðri Osló í lok október 2018, sé ekki lengur á lífi. Lík hennar hefur þó ekki fundist en lögreglan rannsakar málið sem morð. Nýjar upplýsingar koma sífellt fram í málinu og það nýjasta sem norskir fjölmiðlar hafa skýrt frá er hvernig fjölskylda Hagen átti í samskiptum við þá sem sögðust hafa numið Anne-Elisabeth á brott og kröfðust lausnargjalds.

Krafa um greiðslu lausnargjalds var sett fram á miðum sem fundust á heimili Hagen-hjónanna eftir hvarf Anne-Elisabeth. Hagen-hjónin eru milljarðamæringar og því þótti ekki útilokað að Anne-Elisabeth hefði verið rænt til að hægt væri að krefja eiginmann hennar, Tom Hagen, um hátt lausnargjald.

VG hefur nú komist yfir upplýsingar um þá kóða sem voru notaðir og var hægt að nota í samskiptum Hagen-fjölskyldunnar við þá sem kröfðust lausnargjalds. Óhætt er að segja að sumir þeirra séu óhugnanlegir.

Kóðarnir byggjast á að ef ákveðin upphæð var greidd í rafmyntinni Bitcoin var hægt að reikna út hvað það þýddi. VG skýrir ekki frá upphæðum fyrir hver skilaboð en skýrir frá þeim 12 skilaboðum/kóðum sem var hægt að nota í samskiptum fjölskyldunnar og þeirra sem kröfðust lausnargjaldsins. Sex eru frá Hagen-fjölskyldunni og sex frá þeim sem kröfðust lausnargjaldsins.

Svona voru kóðar Hagen-fjölskyldunnar:

X Bitcoin = Ég staðfesti að ég vil borga.

X Bitcoin = Ég er búinn að senda peninga og bíð eftir að fá meira monero (rafmynt sem Tom Hagen átti að nota að kröfu þeirra sem kröfðust lausnargjaldsins)

X Bitcoin = Ég sendi monere (peninga) eftir sjö daga.

X Bitcoin = Það er ákveðið vandamál, ég þarf meiri tíma.

X Bitcoin = Ég er búinn að senda hluta af monero, bíð eftir meiru.

X Bitcoin = Ég er búinn að senda alla monero (9 milljónir evra).

Svona voru kóðar gagnaðilans:

X Bitcoin = Lítill tími, hafðu hraðann á eða hún deyr.

X Bitcoin = Of langur tími. Hún er dáin.

X Bitcoin = Lögreglan er að leita. Ekki þess virði fyrir okkur. Hún er dáin.

X Bitcoin = Hef ekki móttekið monero. Sendu á réttan viðtakanda.

X Bitcoin = Hef ekki fengið alla monero.

X Bitcoin = Hef fengið alla monero. Anne-Elisabeth verður sleppt á næstu 24 klukkustundum.

En það var síðan mat lögreglunnar og fjölskyldunnar að þetta væri ekki nægilega góður samskiptamáti og því var byrjað að eiga í samskiptum í gegnum dulkóðaðan tölvupóst.

Tom Hagen greiddi 10 milljónir norskra króna á ákveðnum tímapunkti en eftir að sú greiðsla var innt af hendi heyrðist ekki meira frá þeim sem kröfðust lausnargjaldsins.