Á föstudaginn voru 26 ára kona og 31 árs karl fundin sek um nauðgun á vinkonu konunnar. Það var dómstóll í Hróarskeldu í Danmörku sem kvað dóminn upp. Maðurinn var dæmdur í 14 mánaða óskilorðsbundið fangelsi en ekki verður tekin ákvörðun um refsingu konunnar fyrr en geðrannsókn á henni er lokið.

Í umfjöllun Sjællandske Nyheder um málið kemur fram að fólkið hafi áður verið par og það hafi verið á þeim tíma sem þau nauðguðu konunni. Þau áttu sér þann draum að stunda kynlíf með konunni, að fara í trekant með henni, en hún hafði hafnað boði þeirra þar um.

En þau enduðu engu síður saman uppi í rúmi þar sem maðurinn nauðgaði vinkonunni. Unnustan var einnig með í rúminu og var hálfnakin.

Fyrir dómi kom fram að fórnarlambið hafi verið veik, þreytt og undir áhrifum þegar henni var nauðgað og hafi því ekki getað barist á móti.

Fyrir dómi gáfu hin dæmdu í skyn að konan hefði átt að segja nei þegar ofbeldið átti sér stað. Dæmda konan viðurkenndi fyrir dómi að eftir nauðgunina hefði hún komist að því að það sem vinkona hennar gekk í gegnum hefði ekki verið í lagi.