Sautján Svíar voru um borð í Boeing 737-flugvélinni sem fórst í Íran í morgun. Þetta kemur fram í frétt Aftonbladet. 176 voru um borð í vélinni sem brotlenti skömmu eftir flugtak frá flugvellinum í Teheran. Um var að ræða vél frá úkraínska flugfélaginu Ukraine International Airlines.
Ann Linde, utanríkisráðherra Svíþjóðar, sendi aðstandendum þeirra sem um borð voru samúðarkveðjur.
Í frétt Toronto Star segir einnig að 63 Kanadamenn hafi verið um borð. Flestir voru frá Íran, eða rúmlega 80 farþegar, og þá voru 11 Úkraínumenn um borð. Afganskir, þýskir og breskir ríkisborgarar voru einnig um borð í vélinni.
Tildrög slyssins liggja ekki fyrir en rannsókn stendur yfir.
Yevhen Dykhne, forseti Ukraine International Airlines, sagði í yfirlýsingu eftir slysið að vélin hafi ávallt staðið fyrir sínu. Hún var smíðuð árið 2016 og eru þúsundir véla af þessari tegund í notkun hjá flugfélögum um allan heim.