Lögreglumenn stóðu nýlega 62 ára ökumann að bíræfnu svindli í Arizona í Bandaríkjunum. Hann hafði komið beinagrind fyrir í bíl sínum og klætt hana í fatnað og sett hatt á hana. Tilgangurinn var að láta líta út fyrir að einhver væri í bílnum auk ökumannsins og því mætti aka eftir sérstökum akreinum sem eru aðeins ætlaðar bílum sem fleiri en einn eru í.

Árlega standa lögreglumenn um 7.000 ökumenn að því að nota þessar akreinar þrátt fyrir að vera einir í bíl. En þessi ökumaður ákvað að reyna að láta líta út fyrir að hann væri ekki einn í bílnum og kom beinagrindinni því fyrir í framsætinu og festi hana með gulu bandi. En árvökulir laganna verðir létu ekki blekkjast og upp komst um svikin.

Ökumaðurinn var sektaður en ekki fer sögum af hversu há sektin var.