Fyrirtækið Alphabet, sem er móðurfélag Google, komst á föstudaginn í góðan og fámennan hóp fyrirtækja sem eru metin á meira en 1.000 milljarða dollara. Í þeim hópi má einnig finna móðurfyrirtæki Apple og Microsoft.

CNN skýrir frá þessu. Apple er verðmætasta bandaríska fyrirtækið en það er metið á 1.400 milljarða dollara. Á heimsvísu er það sádí-arabíska olíufélagið Saudi Aramco sem er verðmætast en það var skráð á hlutabréfamarkað í desember og var þá metið á 2.000 milljarða dollara en ekkert annað fyrirtæki hefur náð þeim áfanga. Verðmæti fyrirtækisins hefur þó heldur lækkað og er nú um 1.800 milljarðar dollara.

Amazon netverslunin var í hópi 1.000 milljarða dollara fyrirtækjanna en um þessar mundir stendur verðmæti fyrirtækisins í um 930 milljörðum dollara.

Verð hlutabréfa í Alphabet hefur hækkað um átta prósent það sem af er árinu. Verð hlutabréfa í fleiri tæknifyrirtækjum hefur einnig hækkað vegna vaxandi bjartsýni eftir að samið var um vopnahlé í viðstkiptastríði Kína og Bandaríkjanna.