Tveir háskólastúdentar í Kaupmannahöfn eiga fangelsisdóm yfir höfði sér eftir að upp komst að þeir voru aðeins of duglegir við að nota klippa/klístra möguleikann í tölvunum sínum. Talsmaður lögreglunnar segir að fólkið verði ákært og þurfi því að mæta fyrir dóm.

TV2 skýrir frá þessu. Samkvæmt frétt miðilsins þá er annarsvegar um 24 ára karlmann að ræða sem var staðinn að því síðastliðið haust að hafa breytt einkunnum sínum í tengslum við atvinnuumsókn. Hinsvegar er um 24 ára konu að ræða sem er grunuð um að hafa tvisvar á síðasta ári falsað læknisvottorð til að koma sér undan að mæta í próf.

Starfsfólki skólans fannst vottorðin grunsamleg og rannsakaði þau betur. Á öðru þeirra var fölsuð undirskrift læknis en á hinu var engin undirskrift.

Bæði hafa viðurkennt falsið og eiga 30 til 40 daga fangelsi yfir höfði sér.

Lögreglan í Kaupmannahöfn fær um 30 mál af þessu toga til rannsóknar á ári hverju.