57 ára karlmaður var á laugardaginn úrskurðaður í gæsluvarðhald af dönskum dómstól fyrir að hafa verið með 160 kíló af hassi í vörslu sinni. Það voru lögreglumenn á Sjálandi sem fundu þetta mikla magn hass á föstudaginn þegar þeir leituðu í bíl mannsins sem var lagt við hús í Hillerød.

Ekstra Bladet hefur eftir talsmanni lögreglunnar að tilviljun hafi að mestu ráðið því að hassið fannst. Talsmaðurinn vildi ekki segja af hverju lögreglan fór að húsinu í Hillerød. Hann sagði að vegna rannsóknarhagsmuna vilji lögreglan halda spilunum þétt að sér að sinni.

Maðurinn á þungan dóm yfir höfði sér verði hann fundinn sekur um vörslu efnisins.