Donald Trump, Bandaríkjaforseti, ávarpaði stuðningsfólk sitt á mánudaginn og ræddi þá meðal annars um forval demókrata fyrir forsetakosningarnar í haust. Hann nýtti tækifærið til að hvetja óháða kjósendur til að kjósa ”veikasta demókratann” í forkosningunum i New Hampshire sem fóru fram á þriðjudaginn.

„Eini vandinn sem ég glími við er að ég er að reyna að komast að hver er veikasti frambjóðandinn. Mér finnst þeir allir veikburða. Þeir vita ekki hvað þeir eru að gera. Þeir geta ekki einu sinni talið atkvæðin sín.”

Sagði Trump og vísaði þar til vandræðagangsins með atkvæðatalninguna í Iowa í síðustu viku.

„Veit einhver hér hver sigraði í Iowa? Ég veit það ekki.”

Sagði Trump einnig.

Hann vék einnig að kórónavírusnum sem hefur nú orðið á annað þúsund manns að bana og Alþjóðaheilbrigðismálastofnunin segir vera alþjóðlega heilbrigðiskrísu. Hann sagði að vírusinn yrði úr sögunni í apríl þegar hlýnar í veðri en studdi þessa spá sína ekki með neinum vísindalegum rökum segir USA Today.