Nýlega voru rúmin, sem „þorpsbúum“ verður boðið upp á, kynnt fyrir fjölmiðlum. Umhverfisvæn rúm í meira lagi því þau eru úr pappa. Dýnurnar eru úr endurunnu plasti. Sumir óttast að rúmin verði ekki góð til svefns og enn aðrir hafa áhyggjur af að þau muni henta illa til kynlífsiðkunar.
Það hefur lengi loðað við Ólympíuleikana að þátttakendurnir séu duglegir þegar kemur að kynlífsiðkun og til dæmis sagði breski borðtennisspilarinn Matthew Syed frá því í lesendabréfi í The Times árið 2008 að leikarnir væru eins og kynlífshátíð. Hann sagði að þegar hann tók fyrst þátt í Ólympíuleikum, í Barcelona 1992, 21 árs að aldri hafi hann varla haft undan að stunda kynlíf þrátt fyrir að vera ekkert augnakonfekt.
En papparúmin falla misjafnlega í kramið hjá þátttakendunum. Til dæmis tjáði ástralski körfuknattleiksmaðurinn Andrew Bogut sig um þau á Twitter.
„Fín hugmynd . . . þar til íþróttamennirnir hafa lokið keppni og þær þúsundir smokka, sem verður útdeilt í þorpinu, verða teknir í notkun.“
Bogut vegur sjálfur 120 kg og er 213 sm. Það verður því ákveðin áskorun fyrir hann að sofa í svona rúmi því þau eru bara 210 sm að lengd. Hámarksburðarþol þeirra er 200 kg.
En fyrirtækið Airweave, sem framleiðir rúmin, hefur ekki áhyggjur af burðarþolinu. Talsmaður þess sagði að margar tilraunir hafi verið gerðar á burðarþolinu og að svo lengi sem það séu bara tveir í rúminu þá eigi það að þola þyngdina.
18.000 rúm hafa verið framleidd en auk íþróttamanna munu þjálfarar, starfsmenn og margir aðrir búa í Ólympíuþorpinu.
Þegar síðustu leikar fóru fram í Rio de Janeiro var um hálfri milljón smokka deilt út til gesta Ólympíuþorpsins. Það verður því spennandi að sjá hvort papparúminu standi fyrir sínu þegar fjör færist í leikinn.