Í síðustu viku fór matarhátíð fram í Stokkhólmi undir heitinu „Gastro summit“ en á hátíðinni var aðaláherslan á mat framtíðarinnar. Í einni málstofunni setti sænski atferlisfræðingurinn Magnus Söderlund fram nýstárlega hugmynd um hvernig er hugsanlega hægt að bjarga loftslaginu. Margir fitjuðu upp á trýnið og lyftu augabrúnum þegar þeir heyrðu boðskap hans og enn aðrir voru við það að æla.

Í einföldu máli gengur boðskapur Magnus út á að til að bjarga loftslaginu þá verðum við að byrja að borða mannakjöt í stað annars kjöts. Hann ræddi þetta síðan við TV4 sjónvarpsstöðina.

„Þegar rætt er um að borða mannakjöt er það stórt tabú sem erfitt er að brjóta. Af þeim sökum held ég að þetta muni aldrei verða mikið stundað í hinum vestræna heimi og hvað þá á okkar æviskeiði. Flestum finnst þetta mjög ógeðslegt og undarlegt. Við reynum nú að öðlast skilning á af hverju viðhorfið er svona.“

Því næst spurði fréttamaðurinn Magnus af hverju það eru ósjálfráð viðbrögð flestra að hafna hugmyndinni um að borða mannakjöt til að bjarga loftslaginu.

„Fólkið, sem á að borða, verður jú að vera dáið. Dáið fólk er í sjálfu sér tabú. Það má heldur ekki vanhelga mannslík. Það er erfiðara að brjóta þetta tabú en að drepa annað fólk.“

Svaraði Magnus og bætti við að fólk væri almennt íhaldssamt þegar kemur að því að borða mat sem það er ekki vant að borða.

„En ef við viljum snúa hverjum steini við til að leysa loftslagsvandann þá er mikilvægt að beina sjónum okkar að mannakjötsneyslu.“