Óttast er að fjöldi látinna á Bahamaeyjum eftir að fellibylurinn Dorian gekk yfir eyjarnar muni aukast mjög á næstu dögum. Þúsunda íbúa er saknað og um 70 þúsund íbúar þurfa sárlega á aðstoð að halda. Eyjan Great Abaco, sem er í Abaco-eyjaklasanum, er allt að því óhæf til búsetu.

Samkvæmt opinberum tölum hafa 30 látist en óttast er að fjöldinn muni aukast hratt í dag og næstu daga. „Við óttumst að talan verði mjög há,“ sagði Duane Sands, heilbrigðisráðherra Bahamaeyja við fréttamenn í morgun.

Dorian var einn öflugasti fellibylur sögunnar en hann var fimmta stigs og hékk yfir eyjaklasanum stóran hluta vikunnar.

„Það er allt farið, fólk er orðið mjög örvæntingarfullt. Fólk er að stela og skjóta hvort annað til að komast í mat og vatn,“ hefur breski miðilinn Mail Online eftir íbúa. Hafa yfirvöld brugðið á það ráð að efla löggæslu til muna vegna fregna af innbrotum og þjófnaða úr matvöruverslunum.

Aðgerðir hafa staðið yfir sem miða að því að koma fólki á svæðum sem urðu verst úti til höfuðborgarinnar Nassá. Þær aðgerðir hafa tekið lengri tímar en vonir stóðu til vegna vatnselgs á Grand Bahama-alþjóðaflugvellinum.