Breið pólitísk samstaða náðist á danska þinginu í síðustu viku um að styrkja samkeppniseftirlitið þannig að það geti betur gripið inn í það sem margir segja eintóma græðgi fjármálastofnana. Allir stærstu flokkarnir á þingi, bæði úr stjórn og stjórnarandstöðu, standa að samkomulaginu. Samkvæmt lagafrumvarpi sem verður lagt fram munu samkeppnisyfirvöld geta gripið inn hvað varðar „ósanngjarna gjaldtöku og hagnað“.

Í grunninn snýst málið um gjaldtöku þegar einstaklingar og fyrirtæki nýta sér beinbreiðslur til að greiða reikninga sína. Það er greiðslumiðlunarfyrirtækið Nets sem situr að þeim markaði í dag. Fyrir hverja beingreiðslu tekur Nets 4,32 danskar krónur í þóknun. Það má nærri geta að hér er ekki um neinar smáupphæðir að ræða í mánuði hverjum þegar tugmilljónir reikninga eru greiddir. Nýlega kom fram í fréttum að raunkostnaðurinn við hverja beingreiðslu er aðeins nokkrir aurar, allt annað er gjald sem rennur beint í sjóði Nets sem deilir ágóðanum síðan með bönkum landsins.

Reiknað er með að nýju lögin taki gildi í byrjun næsta árs. Samkvæmt þeim geta samkeppnisyfirvöld fyrirskipað fyrirtækjum að lækka gjaldtöku sína ef sýnt þykir að verðin séu ósanngjörn og ekki í neinu samræmi við raunkostnað. Með þessu á að koma í veg fyrir að fjármálafyrirtæki misnoti markaðsaðstöðu sína.