Eins og margoft hefur komið fram í fjölmiðlum á undanförnum vikum herja miklir skógareldar á Amazon regnskóginn og þá sérstaklega í þeim hluta hans sem er í Brasilíu. En nú brennur annað svæði, ekki síður mikilvægt, nærri Amazon.

CNN segir að eldarnir þar séu enn verri en í Amazon. Hér er um svæði að ræða sem heitir Cerrado en þar eiga 5 prósent af dýra- og plöntutegundum heimsins heimkynni og hvergi er fjölbreytnin meiri en þar. Cerrado nær yfir 200 milljónir hektara lands, eyðimörk og skóg.

Þar eru 837 fuglategundir, 120 skriðdýrategundir, 150 sveppategundir, 1.200 fiskategundir, 90.000 skordýrategundir, 11.000 plöntutegundir og 199 tegundir spendýra. Margar þessara tegunda eru hvergi annarsstaðar til en í Cerrado.

Oliveira Rosa, hjá náttúruverndarsamtökunum WWF Brazil, sagði í samtali CNN að svæðið missi um 700.000 hektara lands árlega.

Frá 2001 til 2018 töpuðust 54 milljónir hektara skóglendis í Brasilíu vegna ágangs manna. Skógar eru ruddir til að rýma fyrir landbúnaði.