Elon Musk, stofnandi SpaceX og Tesla, vill að lög og reglur verði sett um notkun gervigreindar. Hann segir að gervigreind geti komið að góðum notum, til dæmis við að aka bílum og muni auka umferðaröryggi mikið. En hann bendir einnig á að gervigreind geti fallið í rangar hendur og orðið hættulegri en kjarnorkuvopn.

Hann segir að finna verði leið til að tryggja að notkun gervigreindar verði aðeins í tilgangi sem þjónar mannkyninu.

„Ég held að þetta sé stærsti tilvistarvandinn sem við stöndum frammi fyrir og sá sem liggur mest á að leysa. Ég er yfirleitt ekki talsmaður laga og reglna og eftirlits en í þessu samhengi tel ég að við verðum að reyna að draga úr hættunni en mikil hætta getur steðjað að almenningi.“

Sagði hann og bætti við:

„Takið mark á orðum mínum, gervigreind er miklu hættulegri en kjarnorkuvopn.“