Hefur þú hugleitt hvernig þú heilsar vinnufélögum þínum á morgnana? Eflaust þurfa flestir ekki að hugsa út í þetta þar sem þeir heilsa vonandi á kurteisan hátt. En það eru ekki allir sem gera það.

Þessu fékk dönsk kona að kenna á þegar hún hóf störf á nýjum vinnustað. Þegar yfirmaðurinn mætti til vinnu á morgnana hafði hann fyrir vana að segja: „Góðan dag píkur“.  Að vonum fór þetta fyrir brjóstið á konunni sem fannst á sér brotið.

Hún leitaði til stéttarfélags síns, HK, sem rekur málið fyrir hennar hönd þessa dagana. Skýrt er frá þessu í fréttablaði HK, A4 Arbejdsmiljø.

Þar kemur fram að í dag sé vitað að kynferðisleg áreitni geti verið allt frá líkamlegu til andlegs áreitis. Þess utan liggi fyrir dómsniðurstöður um að fyrirtækjum beri að tryggja að orðræðan á vinnustaðnum sé við hæfi. Það þýði að það sé á ábyrgð fyrirtækisins ef nýju starfsfólki finnst á sér brotið þegar yfirmaðurinn segir „Góðan dag píkur“.