Fertug kona í Santa Barbara í Kaliforníu, að nafni Ashlee Buzzard, hefur verið handtekin eftir að skothylki sem fundust nálægt líki dóttur hennar reyndust sömu gerðar og skothylki sem fundust á heimili móðurinnar.

Lík hinnar níu ára gömlu Melody Buzzard fannst 6. desember í óbyggðum Utah. Karl og kona sem voru að taka myndir fundu líkið og höfðu samband við lögreglu. Rannsóknarlögreglumenn gátu ekki borið kennsl á líkið strax en komust að þeirri niðurstöðu að stúlkan hefði verið skotin í höfuðið.

Þann 14. október tilkynntu skólayfirvöld um fjarvistir Melody frá skóla. Lögreglumenn fóru þá heim til móður hennar en hún vildi ekki segja þeim hvar dóttir hennar væri. Viku áður höfðu mæðgurnar farið í langa bílferð, fóru þær alla leið til Nebraska (frá Santa Barbara í Kaliforníu) og tóku ferðahlé í Arizaona og Utah. Gögn úr eftirlitsmyndavélum leiddu í ljós að þær breyttu um útlit á leiðinni og báru mismunandi hárkollur.

Einnig skipti Ashlee um bílnúmersplötu á bílnum sem hún ók, en hann var frá bílaleigu. Þann 10. október, þremur dögum eftir brottför, sneri hún aftur heim, en án Melody.

Hún situr núna í gæsluvarðhaldi og er sterklega grunuð um að hafa orðið dóttur sinni að bana. Ashlee hefur neitað sök.

Bill Brown, lögreglustjóri í Santa Barbara, segir að það sé afar sjaldgæft að móðir myrði sitt eigið barn og erfitt sé að skilja slíkan verknað. Hann segir glæpinn hafa verið þaulskipulagðan og að yfirlögðu ráði en ekki er vitað um ástæðu fyrir morðinu.

„Melody átti skilið betra líf en það sem hún upspskar,“ segir Brown.

Nánar má lesa um málið hér.