Nicolás Maduro, forseti Venesúela, og eiginkona hans hafa verið ákærð í New York fyrir fíkniefnahryðjuverk, fíkniefnainnflutning og fyrir að hafa í vörslum sínum vopn sem mun hafa verið ætlað að beita gegn Bandaríkjunum. Frá þessu greinir dómsmálaráðherra Bandaríkjanna, Pam Bondi, á samfélagsmiðlum.

„Þau munu senn mæta fullum ofsa bandaríska réttlætisins á bandarískri grundu fyrir bandarískum dómstólum,“ sagði ráðherrann sem þakkar Donald Trump Bandaríkjaforseta fyrir að hafa hugrekkið til að draga Maduro til ábyrgðar fyrir glæpi hans gegn bandarísku þjóðinni.

Alþjóðasamfélagið stendur á öndinni eftir aðgerðir Bandaríkjahers í morgun, en herinn gerði ekki bara loftárásir á Venesúela heldur lét sérsveit sína handsama Maduro. Að sögn Donalds Trump hefur Maduro nú verið flogið frá Venesúela. Bandarísk stjórnvöld segja að Maduro hafi verið handtekinn. Aðrir vilja meina að honum hafi verið rænt, enda hafi Bandaríkin ekki lögsöguna til að handtaka leiðtoga fullvalda ríkis á hans eigin heimavelli. Stjórnvöld í Venesúela hafa kallað eftir svörum frá Bandaríkjunum um hvort Maduro hafi aðeins verið rænt, eða hvort hann hafi verið myrtur.

Yfirmaður utanríkismála Evrópusambandsins, Kaja Kallas, hefur kallað til stillingar. Evrópusambandið hafi ítrekað lýst því yfir að Maduro sé ekki réttkjörinn leiðtogi og kallað eftir friðsömum valdaskiptum. Hins vegar þurfi að fylgja grundvallarreglum alþjóðsamfélagsins.

Skiptar skoðanir eru á aðgerðunum í Bandaríkjunum. Í könnun sem CBS lét gera í nóvember á síðasta ári sögðust 70 prósent svarenda vera mótfallin hernaðaraðgerðum gegn Venesúela og aðeins 13 prósent svarenda töldu að Bandaríkjunum stæði ógn af þessari nágrannaþjóð sinni.

Ekki er vitað hvað tekur nú við hjá Venesúela en talið er ólíklegt að Maduro muni segja sig frá embætti án þess að fá nokkuð í staðinn. Al Jazeera segir sérfræðinga óttast að borgarastyrjöld sé fram undan.