Þegar lögreglan í Zhejiang-héraðinu í Kína vann að rannsókn máls í síðustu viku hnaut hún um annað mál sem átti rætur að rekja eitt ár aftur í tímann. Það snýst um einstæða móður sem seldi tvíbura sína í september á síðasta ári fyrir sem svarar til um 1,1 milljónar íslenskra króna.

AsiaOne skýrir frá þessu. Fram kemur að konan sé á þrítugsaldri. Hún sagði lögreglunni að hún hafi ákveðið að selja börnin því hún hafi verið blönk og skuldað háar fjárhæðir. Foreldrar hennar höfðu neitað að hjálpa henni með börnin nema hún gifti sig.

Faðir barnanna vildi heldur ekki taka þátt í uppeldi þeirra. Hann var ekki til staðar þegar þau fæddust og lét raunar ekki sjá sig fyrr en barnsmóðir hans hafði selt börnin. Þá vildi hann að hún greiddi skuldir hans með peningunum.

Konan ákvað að skipta söluverðinu með honum. Sinn hluta notaði hún til að greiða skuldir og kaupa sér nýjan farsíma.

Foreldrarnir voru bæði handtekin en þá höfðu þau eytt öllum peningunum. Lögreglan fann börnin sem höfðu verið seld sitt hvoru parinu í Anhui-héraði. Þau eru nú í umsjá foreldra konunnar.

Parið á allt að 10 ára fangelsi fyrir höfði sér.