Maður sem skaut þrjá unglinga til bana við heimili sitt í Atlanta í Bandaríkjunum í gærmorgun hefur ekki verið ákærður vegna málsins. Að sögn lögreglu bendir margt til þess að um sjálfsvörn hafi verið að ræða.

Það var um fjögur leytið, aðfaranótt mánudags, að tilkynning um skothvelli barst lögreglu í einu af úthverfum Atlanta. Þegar lögregla kom á vettvang fundust þrír unglingspiltar, tveir sextán ára piltar og einn fimmtán ára, látnir.

Lee Thomas, yfirmaður rannsóknardeildar lögreglunnar í Rockdale-sýslu, segir að svo virðist vera sem piltarnir hafi skipst á skotum við manninn. Sá síðarnefndi hafði farið út um nóttina vegna hávaða en þá kom í ljós að piltarnir voru að reyna að ræna fólk sem átti leið fram hjá húsinu. Ungu piltarnir voru allir með grímu fyrir andlitinu. Einn piltanna var úrskurðaður látinn á vettvangi en hinir tveir létust á sjúkrahúsi skömmu eftir komuna þangað.

Að sögn lögreglu var það húsráðandinn, sá er skaut piltanna, sem hafði samband við lögreglu. Hann var fluttur á lögreglustöð en hefur ekki verið kærður vegna málsins. Georgía er eitt þeirra ríkja þar sem svokölluð Stand Your Ground Law eru í gildi, en samkvæmt þeim mega til dæmis húsráðendur verja sínar eignir, híbýli sem dæmi, með öllum tiltækum ráðum.

Ekki liggur fyrir hvort kæra verði lögð fram en að sögn lögreglu bendir margt til þess að húsráðandinn hafi verið í fullum rétti þegar atvikið varð.