Starfsmaður heimahjálpar í Uddevalla í Svíþjóð hefur verið handtekinn grunaður um að hafa nauðgað níræðri konu, skjólstæðingi heimahjálparinnar. Ættingjar konunnar segja að þetta hafi gerst í síðustu viku.

Bohusläningen skýrir frá þessu. Fram kemur að maðurinn sé grunaður um að hafa nauðgað konunni þegar hann var heima hjá henni að aðstoða hana við að baðast. Hann hefur verið úrskurðaður í gæsluvarðhald.

Vinnuveitandi mannsins staðfesti að maðurinn væri í haldi lögreglunnar og að honum hafi verið sagt upp í kjölfar málsins. Maðurinn hefur aldrei áður komist í kast við lögin.