Getur virkilega verið að þeir mörg hundruð þúsund Bandaríkjamenn sem eru bitnir af mítlum og smitast af borrelíósu árlega séu óafvitandi fórnarlömb misheppnaðrar tilraunar Bandaríkjahers frá því á sjötta áratugnum? Þessu vilja þingmenn í fulltrúadeild Bandaríkjaþings fá svör við en deildin hefur fyrirskipað varnarmálaráðuneytinu að rannsaka hvort tilraunir hafi verið gerðar með „mítla og önnur skordýr frá 1950 til 1975 sem líffræðileg vopn“.

Rannsaka á hvort hugsast geti, ef svona tilraunir voru gerðar, að einhverjir mítlar hafi sloppið úr tilraunastofum. Öldungadeildin á enn eftir að samþykkja þetta en hún verður að samþykkja tillöguna til að hún verði að veruleika. CNN og The Guardian skýra frá þessu.

Fram kemur að Chris Smith, þingmaður repúblikana, hafi lagt tillöguna um rannsóknina fram. Hann segist hafa lesið fjölda bóka og greina sem bendi til að bandarískar stofnanir hafi hið minnsta kannað möguleikana á að nota mítla sem líffræðileg vopn.

Í bók eftir Kris Newby, sem er vísindamaður við Stanford háskólann og fórnarlamb mítils, kemur fram að tengsl séu á milli útbreiðslu borrelíósu og misheppnaðra tilrauna. Nota hafi átt mítla, mý og flær til að smita fólk af hættulegum sjúkdómum á borð við hundaæði.

Newby segir að bandaríska varnarmálaráðuneytið hafi gert tilraunir með þetta til að rannsaka hvort hægt væri að sleppa mítlum og skordýrum yfir óvinasvæðum og láta þau smita fólk þar. Upp úr þessu hafi borrelíósufaraldur nútímans orðið til.