Ef þér finnst hvítlaukur góður hefur þú örugglega upplifað að vera með andfýlu, nú eða fundið miður góða lykt leggja frá vitum annarra. En andfýla þarf ekki endilega að tengjast einhverju sem fólk hefur borðað, hún getur einnig stafað af skorti á mat.

BT hefur eftir Anne Seidelin, næringarráðgjafa og hjúkrunarfræðingi, að ef fólk er að léttast og hefur ekki borðað neitt í þrjár til fjórar klukkstundir gerir andfýla vart við sig hjá flestum. Ástæðan er að við fitubrennslu líkamans myndast svokölluð ketón sem valda slæmri lykt. Sama er uppi á teningnum ef fólk brennir prótíni.

„Ef líkaminn hefur ekki meiri orku frá síðustu máltíð byrjar hann að ganga á kolvetnabirgðirnar. Þegar þær eru búnar brennir hann fitu og það getur einnig valdið slæmri lykt.“

Sagði Seidelin.

Þrátt fyrir að það sé auðvitað hundfúlt að slæma lykt leggi frá vitum manns þegar verið er í megrun þá er andfýlan samt jákvæð að vissu leyti því hún er merki um að innbyrtar hitaeiningar séu færri en þær sem líkaminn þarfnast.

Andfýlan hverfur síðan þegar borðað er en snýr aftur þegar þrjár til fjórar klukkustundir eru liðnar frá síðustu máltíð.

En andfýla getur átt sér fleiri rætur, hún getur til dæmis tengst hægðastíflu sagði Alice Højer Christensen sérfræðilæknir í meltingarsjúkdómum. Hún saðgi að ójafnvægi í þörmunum geti valdið ofvexti baktería í munni og það veldur andfýlu. Það sé ekki nóg að bursta tennur eða nota munnskol til að drepa bakteríurnar. Besta lausnin á þessu sé að breyta matarvenjum sínum til að koma þörmunum í lag.