Þýsk hjón hafa stefnt þýsku ferðaskrifstofunni Tui eftir að þeim var vísað frá borði, þegar þau voru í siglingu með skemmtiferðaskipi í Karabískahafinu, fyrir að hafa haft of hátt þegar þau stunduðu kynlíf. Auk þess létu þau dyrnar inn í káetu sína standa opna á meðan rúmleikfimin fór fram.

Þetta gerðist á fyrsta degi fjórtán daga siglingar. Hjónunum var vísað frá borði þegar skipið kom til Barbados. Þau hafa nú stefnt Tui og krefjast greiðslu á þeim kostnaði sem féll á þau eftir að þau voru skilin eftir á Barbados.

Hjónin, Renate F. og eiginmaður hennar Volker, segjast hafa keypt sér ferð með Mein Schiff 5 sem hófst 1. apríl. Þegar skipið lá við festar við strendur Barbados hafi „ástarbrími“ heltekið þau þegar þau voru í káetu sinni. Þau hafi hins vegar gleymt að loka svaladyrunum. Renate segir að þau hafi stundað mjög hávært kynlíf.

Að ástarleiknum loknum rifust þau og höfðu hátt en ekkert ofbeldi átti sér stað, aðeins hávær orðaskipti. Að rifrildinu loknu fór Volker í sturtu en hún út á svalir að reykja. Þá var barið að dyrum. Þar voru yfirmaður á skipinu og öryggisvörður. Þeir sögðu hjónunum að þau þyrftu að yfirgefa skipið að fyrirmælum skipstjórans.

Talsmaður Tui segir að fyrirtækið setji öryggi gesta sinna ofar öllu og því hafi hjónin verið beðin um að yfirgefa skipið.