Stríðið gegn hryðjuverkasamtökunum sem kenna sig við Íslamska ríkið fer ekki aðeins fram í eyðimörkum Miðausturlanda því það fer einnig fram af miklum móð á internetinu. Samtökin hafa verið dugleg við að nýta sér netið til að dreifa áróðri sínum og til innri samskipta. En barátta samtakanna á netinu beið afhroð í nýlegri aðgerð belgísku og spænsku lögreglunnar ásamt Evrópulögreglunni Europol.

Í tilkynningu frá lögregluliðunum kemur fram að 26.000 reikningum hryðjuverkasamtakanna hafi verið lokað á hinum ýmsu netsvæðum. Fram kemur að að aðgerðinni lokinni hafi samtökin ekki verið til staðar á netinu.

Einnig tókst að loka innri samskiptaleiðum samtakanna á netinu. Níu netþjónustuaðilar og 12 aðildarríki Europol lögðu sitt af mörkum til að þetta tækist allt saman. Meðal þeirra þjónustuaðila sem aðgerðin náði til voru Telegram, Google, Twitter og Instagram.