Nokkrir breskir fjölmiðlar skýra frá þessu og byggja á skjölum sem alþjóðleg samtök rannsóknarblaðamanna (ICIJ) hafa komist yfir.
Kínversk stjórnvöld hafa alltaf haldið því fram að umræddar fangabúðir séu ekki fangabúðir heldur geti fólk komið þangað af fúsum og frjálsum vilja til að fá menntun og hljóta þjálfun. Markmiðið með búðunum sé að vinna gegn öfgahugmyndum og hryðjuverkum. Það hefur þó lengi vakið athygli að umræddar búðir, sem fólk á að sögn að sækja af fúsum og frjálsum vilja, eru umgirtar gaddavír og varðturnum og líkjast einna mest fangelsum.
Samkvæmt skjölum, sem BBC og The Guardian hafa meðal annar séð, þá eru búðirnar notaðar til pyntinga og heilaþvottar. Talið er að allt að einni milljón úígúrumúslima sé haldið fanginni í þessum fangabúðum en margar slíkar hafa verið settar á laggirnar í Xinjiang-héraðinu á undanförnum þremur árum.
Meðal skjalanna, sem var lekið til fjölmiðla, eru fyrirmæli frá kommúnistaflokknum til stjórnenda búðanna. Þar kemu fram að þær eigi að þjóna hlutverki fangelsa, strangur agi á að ríkja og beita á refsingum. Fram kemur að ekki eiga að láta fanga lausa fyrr en þeir geti sannað að þeir hafi breytt hegðun sinni og trú.
BBC hefur eftir Ben Emmerson, mannréttindalögmanni og ráðgjafa úgíúrumúslima, að það sé erfitt að túlka þetta öðruvísi en að um heilaþvott sé að ræða. Hér sé stefnt að því að gera út af við úígúrúmúslima sem þjóðfélagshóp.