Þann 23. maí 1996 var Marcus Mitchell, 44 ára kaupsýslumaður, skotinn í höfuðið og hnakka í skógi nærri belgíska hafnarbænum De Haan. Í tengslum við rannsóknina á morðinu voru Jean Claude Lacote og Hilde van Acker handtekin. Þeim var síðan sleppt úr haldi vegna skorts á sönnunargögnum. Þau hurfu síðan nánast af yfirborði jarðarinnar en nýlega tókst lögreglunni að handtaka þau.

Samkvæmt frétt BBC þá komst dómstóll að þeirri niðurstöðu 2011 að Mitchell hefði lánað skötuhjúunum peninga á sínum tíma í tengslum við viðskipti. Mitchell komst síðan að því að þau höfðu blekkt hann og myrtu þau hann þá. Dómari úrskurðaði þau í gæsluvarðhald að þeim fjarverandi.

Allt frá 2011 hafa skötuhjúin vermt lista Evrópulögreglunnar Europol yfir þá glæpamenn sem mikilvægast þykir að hafa hendur í hári.

Í síðustu viku náðust þau svo en þá voru þau handtekin í Abidjan á Fílabeinsströndinni. Ekki er vitað hvar þau héldu sig öll þessi ár en Suður-Afríka og Brasilía hafa verið nefnd til sögunnar.

Belgískir fjölmiðlar hafa eftir Martin van Steenbrugge, rannsóknarlögreglumanni, að hann hafi reynt að hafa uppi á skötuhjúunum allan sinn starfsferil og að hann gleðjist sérstaklega fyrir hönd fjölskyldu Mitchell.