Áströlsk yfirvöld rannsaka nú hvort Kínverjar hafi reynt að lauma njósnara inn á þing landsins. Ástralska leyniþjónustan, ASIO, staðfesti þetta í fréttatilkynningu. Hún var send út í kjölfar sýningar fréttaskýringaþáttarins „60 Minutes“ þar sem fjallað var um málið. Fram kom að kínversk njósnastofnun hafi boðið kínversk-áströlskum manni eina milljón ástralskra dollara fyrir að bjóða sig fram til þings.

Umræddur maður hét Bo „Nick“ Zhao og var bílasali í Melbourne. Í fréttatilkynningu ASIO segir að leyniþjónustan taki upplýsingarnar, sem komu fram í þættinum, mjög alvarlega og að leyniþjónustan hafi vitað af þessu áður en fjallað var um þetta í þættinum og vinni hörðum höndum að rannsókn málsins.

Scott Morrison, forsætisráðherra, segir málið vekja miklar áhyggjur og ótta.

Í þættinum var haft eftir heimildamönnum innan leyniþjónustunnar að Zhao hafi verið boðin fyrrgreind upphæð og hafi annar kaupsýslumaður í Melbourne haft milligöngu um tilboðið. Zhao fannst látinn á hótelherbergi í mars.