Frá því að efnahagskreppan skall á 2008 hefur útlitið í efnahagsmálum heimsins aldrei verið eins dökkt og nú. Þetta kemur fram í nýrri spá frá OECD. Fyrir ári síðan spáðu samtökin að hagvöxtur á heimsvísu yrði 3,5% á næsta ári en hefur nú lækkað þá spá í 2,9%.

Í spánni kemur fram að þeim mun háðari sem lönd eru alþjóðaviðskiptum þeim mun meira muni þau finna fyrir samdrætti í hagvexti á alþjóðavísu.

Ein af helstu ástæðunum fyrir samdrættinum er að sögn OECD viðskiptastríðið á milli Kína og Bandaríkjanna.

Stofnunin varar við að ekki sé tekið á kólnun hagkerfisins pólitískt. Seðlabankar í stærstu hagkerfum heims hafa brugðist hratt við með tilslökunum í peningastefnu sinni en á pólitíska sviðinu hefur nær ekkert átt sér stað segir OECD.