Breskir hermenn drápu börn og pyntuðu í Afganistan og Írak. Ríkisstjórn landsins og herinn eru sögð hafa leynt sönnunargögnum um ódæðisverk hermanna sem beindust að óbreyttum borgurunum í Afganista og Írak. Þetta segja 11 rannsakendur sem hafa rannsakað málið.

BBC og The Sunday Times skýra frá þessu. Rannsakendurnir tilheyra hinu svokallaða Iraq Historic Allegations Team (IHAT) og Operation Nortmoor. Breska ríkisstjórnin lét báða hópana hætta störfum 2017 án þess að gera nokkuð með þau gögn sem þeir höfðu aflað.

Rannsakendurnir höfðu komist að þeirri niðurstöðu að hermenn úr úrvalssveitum hersins, SAS, hefðu myrt fanga, misþyrmt og pyntað auk þess að beita þá kynferðislegu ofbeldi.  Í Panorama, fréttaskýringaþætti BBC, kemur fram að háttsettir herforingjar hafi leynt þessu af „pólitískum ástæðum“.

„Varnarmálaráðuneytið hafði ekki í hyggju að láta rétta yfir hermönnunum, óháð stöðu þeirra, nema það væri algjörlega nauðsynlegt og engin leið að sleppa við það.“

Sagði einn rannsakendanna við BBC.

Varnarmálaráðuneytið segir að þessar ásakanir séu ósannar. Farið hafi verið í gegnum öll málsgögn og mat lagt á þau.