Slökkviliðsmenn í austur- og vesturhlutum Ástralíu óttast að hinir gríðarmiklu gróðureldar sem þar loga muni færast í aukana á næstu dögum. Ástæðan er að spáð er hlýnandi veðri og enn meiri þurrki ofan á þá miklu þurrka sem herja á svæðið. Í gær mældist allt að 44 stiga hiti á vesturströndinni.

Þess er síðan vænst að hitabylgjan nái austurströndinni nú í vikunni en þar loga verstu eldarnir. Óttast yfirvöld að eldarnir muni breiðast enn frekar út vegna þessa. Mestar áhyggjur hefur fólk af þriðjudegi til fimmtudags en þá er reiknað með að eldarnir muni breiðast enn frekar út.

Fjórir hafa látist af völdum eldanna og bara í New South Wales hafa 367 hús orðið eldunum að bráð. Rúmlega 10.000 ferkílómetrar lands hafa brunnið til þessa. Talsmaður slökkviliðs í Queensland segir að eldarnir verði ekki slökktir á næstu vikum eða mánuðum, svo miklir séu þeir. Langtímaveðurspár spá minni úrkomu en venjulega og meiri hita en venja er.