Yfirvöld á Sardiníu, einni fegurstu eyju Ítalíu, hafa hvatt ferðamenn til að hætta að nota Google Maps – eða að minnsta kosti nota forritið á skynsamlegan hátt og ekki í blindni eins og margir virðast gera.

Þessi viðvörunarorð eru komin til vegna fjölda tilfella þar sem ferðamenn hafa komist í hann krappan eftir að hafa notað forritið. Á undanförnum tveimur árum hafa 144 neyðarboð borist frá ferðamönnum sem hafa villst af leið á eyjunni fögru. Þetta er til dæmis göngufólk sem hefur komið sér í ógöngur eða ökumenn sem reyna að fara ótroðnar slóðir.

Nú síðast þurfti að bjarga tveimur ferðamönnum sem voru að leita að hvítum ströndum eyjarinnar. Þeir villtust af leið og voru komnir upp á fjall á svæði sem er mjög erfitt yfirferðar, meðal annars vegna þverhníptra kletta.

Yfirvöld segja að flestir þessara ferðamanna hafa notað Google Maps, en forritið veiti því miður stundum misvísandi upplýsingar. Nú hafa yfirvöld sett upp skilti þar sem ferðamenn eru varaðir við þessu og hvattir til að beita skynseminni. Þá hafa yfirvöld verið í samskiptum við Google vegna málsins.