Milljónaborgir á borð við New York eiga stóran hlut að máli varðandi losun gróðurhúsalofttegunda. Þær standa að baki um 80 prósenta af losuninni. Loftslagsbreytingarnar hafa einnig áhrif á stórborgirnar sem eru sumar í mikilli hættu vegna hækkandi sjávarborðs og öflugri óveðra en áður. Ástæðan er að margar stórborgir standa við hafið.
Borgaryfirvöld í New York hafa tekið við sér sem og yfirvöld í New York ríki. Nýlega samþykkti þing ríkisins aðgerðaáætlun sem er sögð ein sú metnaðarfyllsta í heiminum. Samkvæmt henni á að vera búið að skera nær alla losun gróðurhúsalofttegunda niður fyrir 2050. Þetta á meðal annars að gera með því að fjárfesta í umhverfisvænni orku á borð við vindorku, sólarorku og vatnsorku.
Sjónunum verður einnig beint að byggingum ríkisins og samgöngukerfið verður tekið í gegn til að bæta orkunýtingu þess. Byggingar í New York valda um 70 prósent af losun ríkisins á gróðurhúsalofttegundum því í þeim er notað mikið af orku til hitunar, til lýsingar og til kælingar. Í framtíðinni eiga eigendur orkuþurfandi skýjakljúfa háar sektir yfir höfði sér ef þeir uppfylla ekki nýjar reglur ríkisins.
Gregg Bishop, hjá borgarstjórn New York, segir að það geti lækkað hita í húsum um allt að 30 prósent ef svart húsþak er málað hvítt því hvíti liturinn endurvarpar sólargeislunum. Af þessum sökum verða milljónir fermetra af húsþökum í borginni nú málaðir hvítir sem og í ríkinu öllu. Þetta mun draga úr notkun á loftkælibúnaði.
Einnig hafa margir farið þá leið að koma upp görðum á þökum bygginga og gera þau græn og umhverfisvæn. Með þessu móti er hægt að draga úr hita í húsunum á sumrin og halda hita í þeim á veturna. Sífellt fleiri þök á iðnaðarbyggingum verða græn og þar er grænmeti ræktað til sölu í nærliggjandi verslunum.
Segja má að borgaryfirvöld hafi vaknað til lífsins varðandi málaflokkinn eftir að fellibylurinn Sandy skall á borginni 2012 en hann olli miklu tjóni.