Nýfætt stúlkubarn fannst í gröf í Uttar Pradesh í Norður-Indlandi, en grunur leikur á að barnið hafi verið grafið lifandi. Frá þessu segir BBC.

Það var innfæddur sem fann stúlkuna og bjargaði henni, en hann var á grafreitnum til að jarða sína eigin dóttur sem lést nokkrum mínútum eftir fæðingu.

Stúlkubarnið var flutt með hraði á sjúkrahús og er líðan þess góð. Lögreglan reynir nú af fremsta megni að finna foreldrana og hver gróf stúlkuna lifandi.

Kynjamisrétti í Indlandi er með því verra sem fyrirfinnst í heiminum og oft litið á konur og stúlkur sem fjárhagslega byrði, sér í lagi í fátækari hverfum og borgum.

Algengara er að fóstrum sé eytt á ólöglegan hátt ef upp kemst að um stúlkubarn er að ræða. Hins vegar er einnig algengt að stúlkubörn séu myrt rétt eftir fæðingu.