Yfirvöld í Japan hafa hvatt íbúa til að vera á varðbergi vegna fellibyls sem mun ríða yfir landið um helgina. Yfirvöld hafa einkum áhyggjur af þéttbýlum svæðum en óttast er að fellibylurinn muni láta verulega til sín taka í Tókýó og nágrenni.

Yfirvöld hafa hvatt íbúa á hættusvæðum til að yfirgefa heimili og aðra til að tryggja nægar birgðir af mat og vatni. Viðbúið er að mjög mikil úrkoma fylgi fellibylnum með tilheyrandi ofsaveðri.

Yasushi Kajihara, yfirmaður á japönsku veðurstofunni, segir að fellibylurinn sem ríður yfir um helgina minni um margt á fellibyl sem reið yfir árið 1958 og olli miklu tjóni. Honum fylgdi gríðarleg úrkoma og varð tjón á um 500 þúsund heimilum. Þá létust 1.200 manns í óveðrinu.

Tókýó er ein fjölmennasta borg heims en stendur að stóru leyti undir sjávarmáli. Veðurfræðingar segja að allt að fimm milljónir manna gætu neyðst til að yfirgefa heimili sín vegna flóða ef allt fer á versta veg.