Bandarísk kona, Tondalao Hall, hefur setið í fangelsi í fimmtán ár vegna þess að hún lét undir höfuð leggjast að tilkynna kærasta sinn til lögreglu vegna kynferðisbrota gegn börnum hennar.

Hall gerðist vissulega sek um glæp en það sem vakið hefur reiði margra er að sjálfur kærastinn, sá sem framdi brotin, var látinn laus úr fangelsi eftir að hafa setið í fangelsi í tvö ár.

Hall var dæmd í 30 ára fangelsi fyrir brotin en nú hefur skilorðsnefnd Oklahoma mælt með því að henni verði sleppt úr fangelsi. Málið er nú á borði ríkisstjórans Kevin Stitt sem tekur endanlega ákvörðun.

Líklegt þykir að Stitt veiti sitt samþykki en hann hefur heitið því að taka til hendinni í refsiréttarkerfi Oklahoma. Hvergi í heiminum eru jafn margir kvenkyns fangar og í Oklahoma miðað við mannfjölda. Megan Lambert, lögfræðingur Hall, segir að mál Hall varpi ágætu ljósi á hvers vegna svo margar konur eru í fangelsi í Oklahoma.