Það var ekki fyrr en íbúi á stúdentagörðum í Christchurch á Nýja-Sjálandi tilkynnti um vonda lykt í húsinu að farið var að kanna með annan nemanda sem bjó á stúdentagörðunum. Hann reyndist vera látinn og hafði verið það í um átta vikur þegar lögreglan fann lík hans. Málið hefur að vonum vakið áhyggjur af aðstæðum námsfólks og vellíðan þess.

The Guardian segir að faðir hins látna hafi einnig sett sig í samband við lögregluna af því að hann náði ekki sambandi við hann. Ekki er enn vitað hvað varð unga manninum að bana en vegna ástands líksins þurfti lögreglan að fá sérhæfða réttarmeinafræðinga til að bera kennsl á líkið og framkvæma nauðsynlegar rannsóknir á því.

Herbergi unga mannsins er innst á gangi. Íbúarnir sjá sjálfir um þrif svo engin lagði leið sína í herbergið.