En Richard var ekki sáttur við sektina því hann var sannfærður um að hann hefði ekki ekið of hratt. Hann stóð fast á sínu og fór með málið fyrir dóm og þá byrjaði áralangt ferli sem kostaði hann sem svarar til 4,5 milljóna íslenskra króna þegar upp var staðið.
BBC skýrir frá þessu. Fram kemur að Richard hafi meðal annars fengið sérfræðinga til að mæta fyrir dóm til að styðja mál sitt. Meðal annars sögðu þeir að hraðamyndavélin, sem myndaði brot hans, hafi verið vitlaust stillt eða að bíll, sem var ekið í gagnstæða átt, hafi ekið á umræddum hraða og hafi kveikt á myndavélinni.
Vegna þess vafa sem upp kom varðandi tæknimál dróst málið á langinn og málskostnaðurinn óx og óx. Það dró ekki úr kostnaðinum að Richard tapaði málinu á fyrsta dómsstigi og áfrýjaði því og tapaði aftur. Þegar upp var staðið hafði hann greitt sem nemur 4,5 milljónum íslenskra króna í málskostnað og auk þess þarf hann að greiða upprunalegu sektina.
Milljónirnar hafði sonur hans átt að fá í arf en Richard er 71 árs. BBC hefur eftir Richard að hann sjái eftir peningunum en hann hafi bara viljað láta réttlætið fram ganga.
