Samkvæmt fréttum bandarískra fjölmiðla komst hann nýlega að því að móðir hans var ekki líffræðileg móðir hans. Frænka hans, Daisy McCarty, telur að það hafi hugsanlega orðið honum ofviða að komast að þessu.
Pilturinn skaut móður sína, föður og þrjú yngri systkin til bana á mánudagskvöldið á heimili fjölskyldunnar í Elkmont í Alabama.
Ekki hefur verið skýrt frá nafni piltsins vegna ungs aldurs hans en lögreglan hefur skýrt frá nöfnum hinna látnu. Pilturinn er sagður hafa hegðað sér mjög undarlega að undanförnu, meðal annars hafi hann kveikt í lifandi dýrum og brotist inn í skólann sinn.
Það var í síðustu viku sem hann heyrði í fyrsta sinn að Mary Sisk, 35 ára, væri ekki líffræðileg móðir hans en hún lést í Indiana 2011 segir al.com. Faðir hans, hinn 38 ára John Sisk, hafði farið fram á fullt forræði yfir piltinum 2010. Þá kom fram fyrir dómi að pilturinn hefði ekki séð móður sína síðan hann var þriggja ára.
Þegar hann hafði verið hjá móður sinni hafði lögreglan oft verið kölluð á vettvang því móðirin var ölvuð eða undir áhrifum lyfja.
Móðirin hélt ekki uppi vörnum fyrir dómi og því fékk John fullt forræði yfir piltinum.
Hann hefur játað að hafa skotið foreldra sína og þrjú systkin, sex mánaða, fimm ára og sex ára, til bana með 9 mm skammbyssu.
Hann er nú í unglingafangelsi og verður ákærður fyrir morð. Saksóknari hefur ekki útilokað að hann verði sóttur til saka sem fullorðinn væri.
