Flestir þekkja eflaust einhvern sem er með eða var með krabbamein eða hjarta- og æðasjúkdóma. Þessir sjúkdómar eru meðal algengustu sjúkdóma heims. Í nýrri rannsókn er farið yfir hvaða sjúkdómar verða fólki að bana. Það er mismunandi á milli landa og fer eftir hvort um hátekju-, miðtekju- eða lágtekjuland er að ræða.

Rannsóknin hefur verið birt í vísindaritinu The Lancet. Fram kemur að fleiri látist af völdum krabbameins en hjarta- og æðasjúkdóma í hátekjulöndum. Í miðtekju- og lágtekjulöndum eru það hins vegar hjarta- og æðasjúkdómar sem verða flestum að bana en 40 prósent allra dauðsfalla má rekja til þessara sjúkdóma.

Krabbameinstilfellum fjölgar frá ári til árs á meðan hjarta- og æðasjúkdómstilfellum fækkar. Ekki er því útilokað að krabbamein verði helsti banavaldur fólks um allan heim innan nokkurra ára.

Rúmlega 162.000 manns tóku þátt í rannsókninni sem náði yfir tæp 10 ár.