Loftsteinn, sem gæti verið stórhættulegur, þýtur framhjá jörðinni í lok ágúst. Skyldi loftsteinninn breyta um stefnu og lenda á yfirborði jarðar, gæti það haft mjög alvarlegar afleiðingar fyrir plánetuna.

Loftsteinninn, sem kallast 2019 OU1, er um það bil 160 metrar að þvermáli. Hann ferðast, samkvæmt bandarísku geimferðastofnuninni NASA, um 13 kílómetra á sekúndu.

Samkvæmt Ole J. Knudsen hjá eðlis- og stjörnufræðistofnun háskólans í Árósum, getur það haft í för með sér mikla eyðileggingu lendi loftsteinninn  á jörðinni.

Það lítur þó ekki út fyrir að jarðarbúar þurfi að hafa neinar áhyggjur í þetta sinn. NASA gerir ráð fyrir því að loftsteinninn muni fara fram hjá jörðinni í um milljón kílómetra fjarlægð hinn 28. ágúst. Til samanburðar er tunglið í 384.000 kílómetra fjarlægð frá jörðinni.