Miejsce Odrzanskie er bara venjulegur lítill bær í Póllandi. Þar búa aðeins 272 og því um mjög lítið samfélag að ræða. En það samanstendur ekki bara af gömlu fólki því eitthvað er af fólki á barneignaraldri þar. Á undanförnum tíu árum hafa nokkur börn fæðst í bænum en allt eru það stúlkubörn, ekki einn einasti drengur hefur fæðst þar á þessum tíma.

Business Insider skýrir frá þessu. Nú hefur bæjarstjórinn brugðist við þessu og hefur heitið glæsilegum verðlaunum handa þeim foreldrum sem eignast næsta dreng.

„Mér finnst þetta undarleg. Það gæti verið gaman að komast að af hverju þetta er svona.“

Segir bæjarstjórinn Rajmund Frischko.

Enginn virðist hafa áttað sig á þessum mikla kynjahalla fyrr en í júní á þessu ári en þá sigraði lið slökkviliðsmanna í bænum, sem eru allt sjálfboðaliðar, í héraðskeppni. Í liðinu eru aðeins stúlkur og konur. Í kjölfar sigursins var farið að kanna málið og kom þá í ljós að 12 síðust börn sem fæddust í bænum eru stúlkur. Í kjölfarið fór orðrómur af stað um að svona hafa þetta verið áratugum saman.

Bæjarstjórinn getur sjálfur vitnað um kynjahallann því hann og eiginkonan eiga tvær stúlkur.

Tomas Golasz, íbúi í bænum, segir að hann og eiginkonan eigi einnig tvær stúlku og vilji gjarnan eignast dreng en það gæti orðið ákveðin áskorun.

„Ég held bara að konur geti ekki fætt drengi í þessum bæ.“