Árlega bráðnar hluti þess íss sem er á Grænlandi. Ástæðan eru loftslagsbreytingarnar sem hafa gert heimshöfin og andrúmsloftið hlýrra en áður. Af þessum sökum hefur jafnvægið raskast og meiri ís bráðnar á sumrin en myndast með snjókomu á veturna. Þessi bráðnun mun valda því að yfirborð heimshafanna mun hækka á meðan núlifandi kynslóðir eru uppi.

Í nýrri rannsókn, sem hefur verið birt í vísindaritinu Science Advances, kemur fram að ef núverandi þróun mála heldur áfram geti Grænlandsjökull verið horfinn með öllu árið 3000. Ef það gengur eftir mun yfirborð heimshafanna hafa stigið um tæplega 7.3 metra miðað við það sem það er í dag. Þar er aðeins um að ræða áhrif bráðnunar á Grænlandi.

Þetta mun hafa gríðarlega alvarlegar afleiðingar fyrir mannkynið og náttúruna í heild sinni um allan heim. Árið 3000 virðist eflaust langt undan en við munum finna fyrir áhrifum þessarar bráðnunar mun fyrr. Um næstu aldamót gæti yfirborð heimshafanna hafa hækkað um 33 sentimetra vegna bráðnunar á Grænlandi að mati vísindamanna.

Danska ríkisútvarpið hefur eftir Shfaqat Abbas Khan, sem vann að rannsókninni, að þetta sé mjög alvarlegt. Ef horft sé 22.000 til 23.000 ár aftur í tímann hafi aldrei orðið bráðnun á borð við þetta.