Þrítug bandarísk kona er grunuð um að hafa ítrekað stundað kynlíf með 17 ára dönskum skiptinema sem dvaldi í Bandaríkjunum. Hún hefur verið kærð fyrir þetta og vinnur lögreglan nú að rannsókn málsins.

Samkvæmt frétt Fort Wayne‘s er konan fjölskyldumeðlimur í fjölskyldunni sem pilturinn dvaldi hjá í Chicago. Vegna stöðu sinnar innan fjölskyldunnar er konan skilgreind sem „forráðamaður“ hans. Eins og áður sagði er hún grunuð um að hafa ítrekað stundað kynlíf með honum á stuttu tímabili.

Þar sem pilturinn er aðeins 17 ára telst hann vera barn samkvæmt bandarískum lögum en í Danmörku er hann hins vegar orðinn fullorðinn hvað varðar kynlíf því þar telst ekki ólöglegt að stunda kynlíf með ungmennum sem hafa náð 15 ára aldri.

Konan er einnig grunuð um vörslu barnakláms.

Foreldrar piltsins eru nú komnir til Bandaríkjanna til að sækja hann en lögreglan tilkynnti henni um málið.